كلمات قصيدة أيوه بغير هشام الجخ
بواسطة : admin | آخر تحديث : 8 ديسمبر، 2020 | المشاهدات: 4.4K
أيوه بغير هشام الجخ
لا أنا نقصان ولا ضعفان
ولا مسطول ولا سكران
ولا زايغ من عيني الضيّ
ولا حد أحسن مني في شيّ
” بس بغير “
واللي قالولك غيرة الراجل قلّة ثقة أو قلة فهم خلق حمير
غيرة الراجل نار في مَرَاجل
نار بتنور ما بتحرقش
واحنا صعايدة بنستحملش
شمسنا حامية وعرقنا حامي وطبعنا حامي
واللي تخلي صعيدي يحبها
يبقي يا غلبها
أصلنا ناس على قد الطيبة
كلنا هيبة
والنسوان في بلادنا جواهر
طب لو عندك حتة ماس
حتخليها مداس للناس؟؟
ولا حتقفلي اوضة عليها بميت ترباس
يمكن حتي تأجري ليها جوزين حراس
يبقي أنا لا أنا جاهل ولا غافل
كل الفرق ما بيني وبينك إني صعيدي
ينعل أبوه ده اليوم الأكحل
اللي لا ليه أخر ولا أول
اللي طلعت لقيتني صعيدي
لو كان بايدي
كنت أعملك هندي بريش
واقلب شعري كنيش كرابيش
وألبس لك سلسلة متدلدلة خرزة وقلب
بس أزاي البس لك سلسلة ؟؟ هو أنا كلب ؟؟؟
ثم العبرة ماهيش في اللبس
أصل المشكلة عندك .. عندك
قلت حاسيبها وبكرة تحس
بعده تحس
بعده تحس
ده أنا لو جبس كنت زعقت
ماشي صداقة وماشي زمالة
بس ما جتش على الرجالة
ماهي النسوان الدنيا كثير
وأنا ما بقولش تخاصمي الناس
ولا تتحجبي عن الرجالة
ولا تعتكفي وتسكني دير
بس ياريت حبة تقدير
” إني بحبك “
وإني بريدك
وإني زرعت حياتي في ايدك
وإني غزلت بنات الدنيا عقود على جيدك
وإني تعبت من التفكير
” وإني بغير “
