شعر حزين عن فراق الأم
بواسطة : admin | آخر تحديث : 30 ديسمبر، 2020 | المشاهدات: 358
شعر فراق الأم
كل الدكاترة قالوا : خير
معندهاش أي حاجة ولا حتى محتاجة لدواء
ما إحنا عارفين شهر مارس والهواء
شوية برد ما يستاهلوش والسن برضه ما تنسهوش
أول مرة أشوف حبيبتي بتتوجع وبتتلوي
وأنا عارف أمي ما تشتكيش غير من القوي
عجزت يمه وشاخ جريدك
ده إنت لسة ماسحة الشقة بايدك
عجزت فجأة
ده إحنا كل جمعة نبوس إديكي عشان نوضب شقتك وتقولي لا
عجزت فجأة
ومالك إبيضيتي ليه ياك حاطة بودرة
مش كنت زيي سمراء
الدكاترة مش بيحكوا حاجة بينا
وأنا قلبي متوغوش وحاسس أن أُمي فيها إن
طب لو مافيشي شي قلقانين عليه حجزوها ليه
لأول مرة أحس دماغي بتشقق وتفكيري بيعمل صوت
مصدقتش ولا إتخيلت وأنا واقف في ساعتها بإنه الموت
رسمت الضحكة على وشي وبزيادة
دخلت عليها عارفاني أنا الكذاب كالعادة
ومين يقفشني غير أُمي إللي عاجناني وخابزاني وخالعة بيدها أسناني
فعرفت بس من عيني إنها شهادة
وشهدت ييجي 100 مرة
ساعتها كل إحساسي إللي كان محبوس طلع برة
وهاجت ذكريات عبت عنيا دموع
وإحساس الطريق إللي ملوهش رجوع
حاولت أخدعها وأستهبل
بقالك عمر بتمثل
وهي معيشاك في الدور وصدقت إنها بتتخم
يا راجل خلي عندك دم
دي حافظة عينيك وتقاطيعك وتهتهتك وألاعيبك
مش هاين عليك الويل
عايزها منين تجيب لك حيل عشان ما يبانش في عنيها العذاب والهم
يا راجل خلي عندك دم
كانت باصالي في عينيها السنين بتفوت
وجوايا كلام من كترة عدى سكوت
كان نفسي أقول أسف وأقول ندمان وأقول خجلان
وأقول لك إني يمه بحبك حب مش معقول
معرفتش ساعتها الحلق كان مقفول
لكن القلب كان مفروط على قلبك وكان بيقول
بحق حروف كتاب الله إللي حافظها على يدك
ومن أيام ما كنت بعد على يدك وعلى عدك
وفرحة خدي يمه وأنا نايم على خدك
وقسماً بإللي قام حدي وقام حدك
ما حبيت في الوجود قدك
جاي دلوقتي تتنغوج بتستعجل في وقت الموت وتتلهوج
مبنحسش بقيمة الثانية غير بعدين
وتسرقنا الحياة ما نفوقش غير والموت مبكي العين
يا شاقة القلب ومسافرة
خدتني الغربة من حضنك سنين كافرة
نسيت نفسي أنا أسف
قالولي الغربة بتعلم دروس وحياة
وإن الغربة يمه دي طوق ونجاة
أتاريها حزام ناسف أنا أسف
ميعادنا يمه في الأخرة
وهي الدنيا إيه يمة حقة مناهتة ومعافرة
خلاص خلينا للأخرة
حتى تكوني محلوة وعليك العين
وأوريكي العيال يمه بقم بتين
وجبت الواد يا ستي عشان ما تضايقيش
حوصيهم يا ستي خلاص ما تخنقنيش
أفراد عيلة هشام المدهشة
دي تعليمات جدتكم المفتشة
ممنوع تناموا في أي يوم أي يوم
قبل ما تصلوا العشاء.
